හිත ඇත්නම් පත කුඩා ද යනුවෙන් අපේ කියමනක් ඇත. එලෙස පතේ කුඩාව නොබලා කාන්තාවකට කළ හැකි යැයි නොහිතන තරම් සුවිශාල කාර්යභාරයක් රට, සමාජය වෙනුවෙන් ඉටු කරන ඇය කොළඹගේ නිෂාරි අනුරුද්ධිකායි. මේ වන විට ග්‍රාම නිලධාරියක් විදියට සේවය කරන ඇය කිහිපවරක් ම සම්මානයටද ලක්ව ඇත. සිරිකත Online ඇය සමඟ කළ සාකච්ඡාවකි මේ.

 

නිෂාරිව හඳුන්වල දෙන්නෙ කිව්වොත්?
මම කොළඹගේ නිෂාරි  අනුරුද්ධිකා ද සිල්වා. මම මේ වන විට විවාහකයි.එක් දරු මවක්.මම අධ්‍යාපනය ලැබුවේ මීගමුව හරිස්චන්ද්‍ර විද්‍යාලයෙන්. මේ වනවිට ග්‍රාම නිළධාරිනියන් විදියට සේවය කරනවා.

 

ග්‍රාම නිළධාරිනියක් කියන්නෙ කාන්තාවකට අභියෝගාත්මක දෙයක්. කොහොමද  ඔබ ඒක ජයගත්තේ?
රාම නිලධාරිනියක් විදියට මම මුලින්ම පත්වීම ගන්නෙ 2015 දී. ඒක විශාල අභියෝගයක් වුණා. මොකද ඒ ගම නිතරම ගංවතුරට ලක්වෙන නිසා. විවිධ ක්ෂේත්‍රවල සේවය කරලා අත්දැකීම් තිබුණත් මේක හාත්පසින්ම වෙනස් වෘත්තියක්. ග්‍රාම නිලධාරී කාර්යාලයක්වත් තිබුණෙ නැහැ . මම ඇවිල්ලා මාස 06 යි ගංවතුරකට ලක් වුණා. ඒ වෙලාවෙ මවුන්ටන් බයිසකලෙන්, පාරුවලින්  ගිහිං මිනිස්සුන්ට සහනාධාර ලබා දුන්නෙ. කොරෝන කාලෙදිත් ජීවිතයත් අවදානමේ  තියාගෙන තමයි අපි සේවය කළේ. ඒකත් ලොකු අභියෝගයක් වුණා. 

ගමේ මරණයක් වුණොත් පාන්දර ද රෑ ද කියන එක අදාළ නෑ  අපි එතනට ගිහිල්ලා අවශ්‍ය කටයුතු සම්පාදනය කරන්න ඕන. අනන්‍යතාවය තහවුරු කරගන්න බැරි වුණොත් ඒ මරණය අපිට භාරගන්න සිද්ධ වෙනවා. මේ වගේ අභියෝග ගොඩක් තියෙනවා. කාන්තාව සුකුමාර කෙනෙක් තමයි නමුත් මේ රැකියාවේදී සුකුමලබව ගැලපෙන්නේ නැහැ.මම මගේ වෘත්තීය ජීවිතයේ දී ගැහැණිය කියන ලේබලය අභියෝගයකට ගත්තෙ නැහැ. මම ඒක යොදාගත්තෙ ශක්තියක් විදියට. මගේ ජීවිතේ ප්‍රශංසාවක් විදියට.

 

ග්‍රාම නිළධාරිනියක් කියන වෘත්තිය  කාන්තාවකට සුදුසු නැහැ කියන මතය ගැන  ඔබට මොකද හිතෙන්නේ?
ග්‍රාම නිලධාරී වෘත්තිය අතීතයේ පටන්ම එන වෘත්තියක් බව ගපති වැනි වචනවලින් සිතාගන්න පුළුවන්. ඒ වචනය පවා පිරිමින් හා  බැඳිලා තිබෙන දෙයක්.මේක ඇතුළේ  පිරිමියෙක්ට කරන්න තියෙන වැඩ කොටස වැඩියි.නමුත් මම හිතනවා ග්‍රාමනිලධාරි වෘත්තියට කාන්තාවක් සුදුසුයි කියලා.මොකද සහකම්පනය කියන දේ  කාන්තාව තුළ විශේෂයෙන්ම තියෙන දෙයක්.ඒ දේ ග්‍රාම නිලධාරිනියක්ට අවශ්‍යම දෙයක්. ගොඩක් අය ඒ වෘත්තියෙ යෙදිලත් තියෙනවා. කාන්තා ගුවන් නියමුවරියන් ,සෙබළියන් වගේ වෘත්තීන්වල යෙදෙන කීදෙනෙක් ඉන්නවද? ඒක නිසා  කාන්තාවට මේ වෘත්තිය ගැලපෙන්නෙ නැහැ කියලා මම පිළිගන්නේ නැහැ.

 

ඔබට සම්මාන බොහොමයක් ලැබිලා තියෙනවා. එහෙම වෙන්න තරම් ඔබ සුවිශේෂී වෙන්නෙ කොහොමද?
මම මාව හඳුනගෙන ඉන්නේ. මම මගේ ආකල්ප හොඳින් හඳුනනවා.මම උපරිම උත්සහ කරන්නේ මම කරන වෘත්තියට උපරිම සාධාරණයක් කරන්න.මම හැම තිස්සේම මගේ වැඩේ කරන්නේ හදවතින්ම. මම හිතනවා ඒක නිසා තමයි මට මේ වගේ සම්මානය ලැබුණේ කියලා.

 

ග්‍රාමීය මට්ටමේ කාන්තාවගෙ නගා සිටුවීම කාන්තාව රාමුගතකරණයත් එක්ක ඔබ ජයගත්තේ කොහොමද ?
කාන්තාවට බිරිඳක් තරුණියක් කාන්තාවක් මවක් මිත්තණියක් කියන බැරෑරුම් චරිත රඟදක්වන්න සිදුවෙනවා.ඒ තුළම  කාන්තාව රාමු ගත වෙනවා.නමුත් කාන්තාව තුළ තුළ විශාල ශක්තියක් වගේම හැකියාවක් තිබෙනවා.ඒක අපි මතු කරන්න ඕන.ඒක ලොකු  අභියෝගයක්.මම ඒ අභියෝගය ජයගෙනත් තිබෙනවා.කාන්තාව තුළ අභිමානය, විශ්වාසය ගොඩනැගීම තුළින් සීමා මායිම් ජයගෙන කාන්තාවන්ට තමන්ගේ ගමන යන්න පුළුවන්. වර්තමාන වෙනකොට කාන්තාව පෙරට වඩා ශක්තිමත්. ස්වයං රැකියාවක් කරල හරි ගෙදරට ශක්තියක් වෙන කාන්තාවන් බොහොමයි.

 

කාන්තාවක් ස්වාධීන වෙනවා කියන්නෙ සමාජ සම්මතය බිඳ දැමීමක් ද?
කාන්තාවක් ස්වාධීන වෙනවා කියන්නේ සමාජ සම්මතය බිඳ දැමීමක් නෙමෙයි .අපි ගොඩක් වෙලාවට කරන්නේ සමාජ  සම්මත ය කියලා අපිටම අනන්‍ය නීති රාමුවක් හදාගෙන ඒකට කොටුවෙලා ඉන්න එක.කාන්තාව ගෙදරටම වෙලා ඉන්න ඕන කියලා මතයක් තිබුණා.නමුත් ඒ  ඉස්සර.සැමියා දරුවෝ නොතකන එක නෙවෙයි ස්වාධීන වෙනවා කියන්නේ තමන්ට තිබෙන දක්ෂතාවයන් හදුනාගෙන ඒ මගින් ඉදිරියට යන එක.නිවැරදි තීරණයක් ගැනීමේ හැකියාව

 

කාන්තාවක් විදියට කොහොමද ඔබ හැමදේම සමබර කරගන්නෙ කොහොමද ?
අපිට හිමිවෙන්නේ පැය 24ක කාලයක් ඒ තුළ සියල්ල කළමනාකරණය කරගන්න සිද්ධ වෙනවා. එතනදි පවුලේ සබැඳියාව කියන එක අතිශයින්ම වැදගත්. මම ගොඩක් මගෙ පවුල එක්ක සහසම්බන්ධයි. එතකොට මට මග ඇරෙන දෙයක් වුණත්  පවුලේ අනිත් අය අතින් ඉටුවෙනවා.ඒ සහයෝගයත් එක්ක වැඩ කළමනාකරණය කර ගන්න එක මට මහා ලොකු දෙයක් නෙමේ. හැමදෙයක්ම නිසි වෙලාවට සැලසුම් කරන්න ඕන. ඒක මම හිතන්නේ ආකල්ප වල තිබිය යුතු දෙයක්.

 

අවසාන වශයෙන් කාන්තාවන්ට ලබා දෙන පණිවිඩය කුමක්ද?
කාන්තාවක් විදියට කාන්තාවන්ට කියන්න තියෙන්නෙ  මුලින්ම තමන්ව හඳුනාගන්න තමන්ට ආදරය කරන්න. තමන්ගේ දුර්වලතා වගේම  ශක්තීන් හඳුනාගෙන ශක්තීන් වැඩි කරගනිමින් දුර්වලතා අඩු කරගනිමින් තමන්ගේ ගමනක් යන්න . ආදරණීය බිරිඳක් මවක් වෙන්න. ඔබ ලෝකයට දෙන්නෙ කුමක්ද පෙරළා ඔබට ඒදේ ලැබෙනවා. ලෝකයා ඔබට ආදරය කරයි, ලෝකයාට ඔබ ආදරය කළොත්.

සටහන - නෙත්මි තෂාරා

---