දියුණු ලෝකයට යන්න නම් මොන පාසලට ගියත් භාෂා තුනම හරියට ඕනෑ
සිංහල ජාතිකයින්ගේ මවු භාෂාව සිංහල වුවත් එම භාෂාවෙන් ලෝකය සමග ගනුදෙනු කළ නොහැක. සිංහල භාෂාව අපට වැදගත් වන්නේ අපේ මවු භාෂාව වන නිසාය. මේ වන විට දරුවන්ට තිබෙන තරගකාරී වටපිටාව සමග ජාත්‍යන්තර භාෂාව වන ඉංග්‍රීසි භාෂාව පමණක් නොව දමිළ භාෂාවත් ඉගෙනීම අත්‍යවශ්‍ය වී තිබේ. දියුණුවන ලෝකයේ නොනැවතී ඉදිරියට යෑමට නම්, ඔවුන්ට ඉංග්‍රීසි දැනුම තිබිය යුතුමය. මවු භාෂාවට අමතරව තවත් භාෂා කිහිපයක් කතා කිරීමේ හැකියාව තිබේ නම් එය මේ තරගකාරී වටපිටාවේ ඉදිරියට යෑමට තමන් සපුරගන්නා අමතර සුදුසුකමක් වේ. කෙසේ නමුත් මේ වනවිට ජාත්‍යන්තර භාෂාව වන ඉංග්‍රීසි නැතිවම බැරි භාෂාවක් යන කාරණය වැඩි පිරිසක් අවබෝධ කරගෙන තිබේ. ඒ නිසාම මවුපියෝ තමන්ට දැනුමක් නොමැති වුවත්, මිල මුදල් අඟහිගකම් පැවතියත් දරුවන් ජාතික පාසල්වලට වඩා ජාත්‍යන්තර පාසල්වලට යොමුකිරීමට පෙලඹෙති. එහෙත් මේ කුමන පාසලට ගියත් අවසානයේ දරුවාට එක් භාෂාවකින්වත් හරිහැටි දැනුමක් නොලැබෙනවා නම් මවුපියන් නොව අතරමං වන්නේ දරුවන්ය. ඒ නිසා දරුවා අතරමං නොකර සාර්ථකව රැගෙන යාමේ වගකීම ඇත්තේ මවුපියන්ටය.
ඉංග්‍රීසි වගේම මවු භාෂාවත් වැදගත්
|
අදහස් දැක්වීම |
ජාත්‍යන්තර භාෂාව ලෙස ඉංග්‍රීසි වැදගත්වන නිසා තමන්ට ඉංග්‍රීසි නොහැකි වුනත් මවුපියන් දරුවන්ට එම හැකියාව ලබාදීමට දරන දැඩි උත්සාහය සමග දරුවන් බොහෝදෙනෙකුට තමන්ගේ මවු භාෂාව පිළිබඳ හොඳ අවබෝධයක් නොලැබී යා හැකිය. සමහර දරුවන් කුඩා කාලයේ සිටම ඉංග්‍රීසි භාෂාවෙන් අදහස් හුවමාරු කරගැනීමට පෙළඹේ. එය සතුටට හේතුවක් වුවත් ඒ සමග මවු භාෂාව ගිලිහී යාමට ඉඩ නොදීමද මවුපියන්ගේ වගකීමයි. එයට හේතුව වන්නේ ලෝකයේ වෙනත් කිසිම භාෂාවකින්වත් ප්‍රකාශ කළ නොහැකි අපූරු සබඳතාවක්, ලෙංගතුකමක් සිංහල භාෂාවේ තිබීමයි. උදාහරණයක් ලෙස හඳ මාමා, කුරුලු බබා, හිරු දෙවියෝ ලෙස සොබාදහමට පවා අපූරු නෑදෑකම් කියන ලෙංගතු භාෂාවක් ලොව වෙන නැති තරම්ය. ඒ නිසාම දරුවෙකුගේ මානව දයාව, ගුණධර්ම, ලෙංගතුකම් පෝෂණයවීමට මවු භාෂාව වූ සිංහල භාෂා දැනුම ක්‍රමානුකූලව ලබාදීම වැදගත් වේ.
ගෙදරට පොත් රාක්කයක්
දරුවන්ට ඉස්තරම්ම දේ ලබාදීම සෑම මවුපියකගේම සිහිනයකි. එහෙත් ඒ ලබාදීම දරුවාගේ සතුටට හේතුවක් වෙනවාට වඩා අනාගතයට යපහතක් වෙනවා නම් වඩාත් සාර්ථකය. භෂා දැනුම දරුවාට අත්‍යවශ්‍ය කියන කාරණය පමණක් දැනගෙන සිටියාට සමහර මවුපියන්ට ඒ ගැන නිවැරදි අවබෝධයක් නැත. එසේ නම් කළ යුතු හොඳම දේ වන්නේ පාසල කුමක් වුවත් අඩුවෙන් ලැබෙන දැනුමට දරුවා වැඩිපුර යොමුකිරීමයි. උදාහරණයක් ලෙස සිංහල පාසලකින් ඉංග්‍රීසි දැනුම ලැබෙන්නේ අඩුවෙන් නම් නිවසේදී ඒ දැනුම ලබාගැනීමේ පරිසරයක් සහ ජාත්‍යන්තර පාසලකින් වැඩිපුර ලැබෙන්නේ ඉංග්‍රීසි දැනුම නම් මවු භාෂාවේ දැනුම ලැබෙන පරිසරයක් පිටතින් නිර්මාණය කළ යුතුය. එයට මවුපියන්ට හැකියාවක් නැතිනම් ඒ දැනුම දිය හැකි ප්‍රබලම අවිය වන්නේ පොතයි. අපේ සමාජයේ මවුපියන් සියලුදෙනාම වගේ දරුවකුට පොතක් ලබාදෙන්නේ දරුවාට අකුරු කියවන මොහොතේ පමණී. එතැනින් එහාට නිතරම පොත්පත් කියවීමට රැගෙන දෙන මවුපියන් සිටින්නේ ඉතාමත් කලාතුරකිනි.
දරුවකුගේ උපන් දිනයකට දහස් ගණන් වියදම් කර වර්ණ පිරුණු තට්ටු ගණන් විශාල කේක් කපා දරුවන් සතුටු කිරීම දැන් අලුත් රැල්ලක් වී තිබේ. එහෙත් උපන්දිනය දවසට දරුවකුට තෑග්ගක් ලෙස කියවීමට ආස හිතෙන විදියේ පොත්පත් ටිකක් රැගෙනදීමට හුඟක් මවුපියන් උනන්දුවන්නේ නැත. ඒ විතරක් නොවේ සාදයට එන නෑදෑ හිතවතුන් පවා දරුවකුට වටිනා පොතක් තෑගි කරන්නේ කලාතුරකිකි. දරුවාට දැනුම දෙන වටිනාම දේ පොත්පත් නිසා නිතරම අඩු දැනුම තිබෙන හිස්තැන පිරවීමට පොත් කියවීමට හුරු කළ යුත්තේ කුඩා කාලයේදීම ය. නොයෙකුත් විසිතුරු දේවල් වෙනුවට පොත් රාක්කයක් නිවසක නිර්මාණය විය යුතුමය.
සාර්ථක ගුරුවයෙකුගේ මගපෙන්වීමක්
අපේ රටේ උසස් පෙළ අවසන් වී එළියට එන දරුවකුගේ පාසල් කාලය වසර දහතුනකි. එහෙත් ඛේදවාචකය වන්නේ වසර දහතුනක් ඉගෙනගෙනත් පාසලින් පිටතට එන බොහෝ දරුවන්ට ඉංග්‍රීසි භාෂාව කතා කිරීමේ ලිවීමේ හැකියාව නැතිවීමයි. මෙහි වගකීම ඇත්තේ ගුරුවරුන්ටද, එසේත් නැතිනම් විෂය පථයේද යන්න ගැටලුවක් පවතී. ඒ වගේම මේ වන විට ජාත්‍යන්තර පාසල්ද විශාල වශයෙන් ආරම්භ කර තිබේ. මේවා තුළ දරුවාට භාෂාවේ නියම පෝෂණයක් ලබාදෙවාද යන්න සොයා බැලීම මවුපියන්ගේද වගකීමකි. දරුවන්ට ඒ හැකියාව ලැබී තිබෙනවාද යන්න පරීක්ෂා කර බැලීමට මවුපියන් උනන්දු විය යුතුය. පන්ති කාමරය තුළ පාසලේ රැඳෙන කාලයේ ඉංග්‍රීසි විෂයට ලැබෙන්නේ සු`ඵ කාලයකි. මේ කාලය තුළදීත් සිංහලෙන් ඉංග්‍රීසි උගන්වනවා නම් එය සාර්ථක නැත. එසේ නම් දරුවකුට අවබෝධයක් ලැබෙන සේ තමන්ගේ විෂය පෙවීම ගුරුවරයාගේ ද දක්ෂතාවකි. මේ සියල්ලගේම අවධානය අවබෝධය එකට එකතු වී යන විට දරුවකුට භාෂාව තුළ අතරමං නොවී සෑම අංශයකින්ම අවබෝධයකින් ඉදිරියට යාමට අවස්ථාව උදා වේ.
සටහන නයනා උදයංගනී
Leave a comment