අවුරුදු ගණනක් හිරවෙලා සිටි දරුවන්ට සතුටක් ගෙනාවා 

මකුළුගස්වැව මහ විදුහලේ ආචාරිනී 
සුහර්ශනී ධර්මරත්න

මෙවර ලෝක ළමා දිනයේ ”සිනහ පිරුණු අපේ ලොවක්” සංකල්පය. ඒ සඳහා දරුවන් සතුටු කිරීම වෙනුවෙන් ගුරුවරුන් විවිධ ක්‍රියාකාරකම්වලට සහභාගී වුණා. ළමා දිනයේදී ගුරුවරුන් විසින් ළමයින් සතුටු කිරීමට විවිධ වැඩසටහන් ක්‍රියාත්මක කළා. ගුරු දිනයේදී ළමයින් විසින් ගුරුවරුන් සතුටු කිරීමට සෞන්දර්යාත්මක ක්‍රියාකාරකම් සහ ගුරු උපහාර වැඩසටහන්ද ක්‍රියත්මක කළා. 

අධ්‍යාපන අමාත්‍යාංශයෙන් විදුහල්පතිවරුන්ට කළ දැනුවත් කිරීමකට අනුව ⁣දරුවන්ගේ පෝෂණ තත්ත්වය ඉහළ නැංවීම, සෞන්දර්යාත්මක, දරුවන් දුසිරිතෙන් ගලවාගැනීම ආදී වැඩසටහන් රැසක් අපි ක්‍රියාත්මක කළා. 
මා දුටුවා සමාජ මාධ්‍යවල මේ පිළිබඳ විවිධ මතවාද, විවේචන පලවෙනවා. ඇත්තටම දරුවන්ගේ සතුට වෙනුවෙන් යමක් ක්‍රියාත්මක කරන්න බොහෝ කාලයක් අවකාශය ලැබුණේ නැහැ. දරුවො වගේම ගුරුවරුත් හිටියේ දැඩි පීඩාවෙන්. ඒ නිසා කාටත් තිබුණේ දරුවන් සතුටු කිරීමේ පරමාර්ථය පමණයි. 

දරුවන්ගේ වැඩසටහන් සඳහා යමක් තෝරා ගනිද්දී ඔවුන්ට ගැළපෙන, සුදුසු දේවල් තෝරාගැනීමට ගුරුවරුන්ට යම් වගකීමක් ඇතැයි කියා මම විශ්වාස කරනවා. හැබැයි අපි සාම්ප්‍රදායික විදියට ම කටයුතු කරන්න අවශ්‍ය  නැහැ. මොකද ලෝකය අලුත් වෙලා තියෙන්නෙ.

හුඟක්දෙනා කතා කරන්නේ නටපු එක ගැන විතරයි 

ගෙලිඔය ප්‍රඥාරතන මධ්‍ය මහා විද්‍යාලයේ ආචාරිනී චාන්දනී
 නයන කුමාරි
මේ වසරේ ගුරු දිනය සහ ළමා දිනය වෙනත් වසරවලට වඩා මතු වුණේ අවුරුදු කීපයක්ම දරුවන් වගේම ගුරුවරුන්ද පීඩනයෙන් සිටි නිසා. ඒ නිසා වෙනදාට වඩා කල එළියක් ඒ තුළ දුටුවා. හැබැයි ඒ වෙනුවෙන් පාසල්වල බොහෝ වැඩසටහන් ක්‍රියාත්මක වුණත් මතුවුණේ නටපු එක විතරයි.

අපේ පාසලේ දරුවන් වෙනුවෙන් සෞන්දර්යාත්මක වැඩසටහන් වගේම පෝෂණීය ආහාර වේලක් ලබාදීම, දැනුම කුසලතා වර්ධනය කරන වැඩසටහන්, චිත්‍ර තරග ආදිය පැවැත්වූවා. දරුවො වෙනුවෙන් කුඩා තිළිණයක් වගේම සහතික පත්‍ර ආදිය ලබා දී දරුවන් දිරි ගැන්වූවා.

මේ දින දෙක පමණක් නෙමෙයි වැඩිහිටි දිනයටත් විශේෂ වැඩසටහන් කළා. ඇත්තටම මේ ආර්ථික අමාරුකම් තියෙන කාලෙ දරුවන්ගේ කෑම ප්‍රශ්නය විසඳන්න ගුරුවරුන් විදියට බොහෝ කැපවීම් කරනවා.

සමහර තැන්වල සීමාව ඉක්මවා ගියා වෙන්න පුළුවන්. හුඟක් පාසල් අනෙක් පාසල් අභිබවා යන්න හැදුවා වගේ. දරවො විවිධත්වයට කැමතියි. අපේ පැත්තෙන් මේ වගේ වැඩක් සංවිධානය කරද්දි ආදර්ශමත්විය යුතුයි. මොකද පරම්පරාවක් පිටුපසින් එනවනෙ. බොහෝ අගය කළ යුතු තැන් අතරේ නොගැළපෙන නිර්මණ තිබුණා. ප්‍රධාන දේ තමයි ගුරුවරයා විසින් අරමුණ පැහැදිලි කර ගැනීම. ගුරුවරයා සියුම් පර්යේෂකයකු වන්නේ එහෙමයි.

දරුවන්ගේ හිත්වල ගුරු ගෞරවයේ අඩුවක් නෑ
 

ගාල්ල සංඝමිත්තා බාලිකා විදුහලේ නි.විදුහල්පතිනී 
නිශාන්ති කැටිපෙආරච්චි

ගුරුවරයා  දරුවන්ට තමන් දන්නා ශිල්පය නිසි ලෙස අවබෝධ කර දෙන්නෙ හරියට මැණික් ගලක් ඔප දමනවා වගේ. දරුවන් දැනුමින් පෝෂණය කරන්නෙ ගුරුවරුන්. තාමත් දරුවන්ගේ හිතේ ගුරු ගෞරවය, භක්තිය තිබෙනවා. නමුත් අද බොහෝමයක් දරුවො ඉන්නෙ විභාග භීතිකාවකින්. ඒ නිසා ඔවුන්ට තමන්ගෙ ගුරුවරු මගහැරෙන අවස්ථා තිබෙනවා. ඒ නිසා ගුරුවරුන් සැමරීමට එක දිනයක් හෝ වෙන්වීම හොඳ දෙයක්.

බොහෝ ගුරුවරු පන්ති කාමරය තුළ දරුවන්ට උගන්වන්නේ තමා දන්නා උපරිමයෙන්. එනැනදි නැටුම්, ගැයුම්, රංගනය අනන්තවත් භාවිතා කරනවා. ඉතින් ඒ වගේ කැපකිරීම් කරන ගුරුවරු ළමා දිනය, ගුරු දිනය දවසේ තමන්ගෙ දරුවන් සමග විනෝදයෙන් සතුටින් සිටියාට ගැටලුවක් මම දකින්නේ නැහැ.

බොහෝ දෙනා සමාජ මාධ්‍යවලින් පොඩි දෙයක් දැකලා විවේචනය කළාට මේ දින දෙකේදි සෑම පාසලකම ගුරුවරුන් තම දරුවන් වෙනුවෙන් මහා මෙහෙවරක් කළා.

අද වෙද්දි මේ දෙකොට්ඨාසයම ඉන්නේ විෂය නිර්දේශ, විභාග තරගය අතරේ. ඒ පීඩනය අවම කරන්න බොහෝ ගුරුවරුන් කැපවුණා. අතීතයේ දරුවන්ට අධ්‍යාපනය හැදෑරීමට තිබුණේ ගුරුවරයාගෙන් ම පමණයි.

එදා සිටි ගුරුවරයාට වඩා අද ගුරුවරයාත් දරුවනුත් අතර ඇති සමීපබව යම් මට්ටමකින් අඩුවෙලා  තිබුණත් ගුරු ගෞරවය අඩු වී නැහැ. අද දරුවන්ට ඉගෙනගන්න ගුරුවරයාට පරිභාහිරව බොහෝ මාධ්‍ය තිබෙනවා. එහෙම තිබුණත් සමස්ත සමාජයේ ගුරුවරයාට තිබුණු තැන අඩුවක් නෑ. ගුරුවරයාත් තම ගුරු ගෞරවය රැකගෙන කටයුතු කළ යුතුයි.

දරුවන් වුණත් විවිධත්වයට කැමැතියි. ඒ නිසා තමයි. මේ දින දෙකේ දී උපරිම සතුටක් ලබන්නේ.